Category Archives: Wararka maanta

Jen Iran ah oo Sucuudiga u hanjabay

XuuthiyiintaTaliye ku xigeenka ciidamada ilaalada kacaanka Iran, Jen. Xuseen Salaami ayaa sheegay in xoogagga Xuuthiyiinta ah ee Yemen ay awood u leeyihiin inay weeraraan deegaannada ku yaalla Xuduudda boqortooyada Sucuudi Carabiya ayna si fudud ku qabsan karaan.

Jen. Salaami oo la hadlayay wakaaladda wararka dalka Iiraan ayaa sheegay in duqeynta uu hoggaaminayo Sucuudiga ee ka dhanka ah Xuuthiyiinta inta badan dalka Yemen qabsaday ay keeni karaan isku-day walba oo ay kooxdu jawaab kaga bixinayso duqeymahaas.

“Weerarrada cirka ah ee lagu wado deegaannada ay Xuuthiyiinta kaga sugan yihiin dalka Yemen ay sababi karto in iyaguna ay duqeeyaan magaalooyin ku yaalla dalka Sucuudiga,” ayuu hadalkiisa ku daray Jen. Xuseen Salaami.

Sidoo kale, Jeneraalka Iiraaniga ah ayaa xusay in haddii maraakiibtooda ku sugan Baabul-mandab oo Badda Cas ku taalla ay helaan fariimmo ka dhan ah weerarro ku soo wajahan ay sida ugu dhaqsiyaha badan kaga jawaabi doonaan.

Hadalka Jen. Salaami ayaa wuxuu imaanayaa xilli xukuumada Iiraan lagu eedeynayo inay taageerto xoogagga Xuuthiyiinta ah ee isku-dayaya in ay xukunka ka tuuraan dowladda sharciga ah ee dalka Yemen.

Dhanka kale, madaxweynaha dibad-joogga ah ee dalka Yemen, C/rabbi Mansuur Haaddi ayaa ku eedeeyay dowladda Iiraan inay Xuuthiyiinta gacan ku siinayso sidii ay Yemen u burburin lahaayeen, una af-gambin lahaayeen xukuumaddiisa.

“Shaki kuma jiro in xukuumadda Iiraan ay gacan ku siinayso Xuuthiyiinta in ay qabsadaan Yemen oo dhan, waxayna ku caawiyaan shidaal iyo hub kala duwan si ay dagaalkooda u sii wadaan,” ayuu yiri Haddi.

Ugu dambeyn, hoggaamiyaha ruuxiga ah ee dalka Iiraan, Cali Khaatimi ayaa kal hore ugu baaqay isbahaysiga uu Suucidgu horkacayo inay duqeymaha ay ka geysanayaan Yemen joojiyaan, isagoo duqeynta ku tilmaamay damb iyo gabood-fal aan wax mar-marsiiyo ah loo heli Karin.

Sucuudiga oo Yamen ku caawinaya 274 milyan oo doolar

sucuudiSucuudiga oo hoggaaminaya weerarada dhanka cirka ah ee ka dhanka ah fallaagada xutiyiinta Yemen ayaa ku yaboobahay dhammaan lacagta ay jimcahii codsatay Qaramada Midoobay si loo gargaaro dadka tabaaleysan ee reer Yemen.

Wakaaladda wararka ee dalka Sacuudiga ayaa sheegayso in dalkaasi uu bixinayo lacag dhan 274 milyan oo doolar oo wax looga qabanayo xaaladda bani’aadanimo ee haysata dadka reer Yemen ee dagaalada halkaasi ka socda ay saameeyeeyn.

War rasmi ah oo uu soo saaray Sacuudiga ayaa waxa lagu sheegay in Sacuudigu uu garab taagan yahay walaalahood Yemen.

Dhanka kale, madaxweynaha dalka Iran Xasan Ruuxaani ayaa weerar dhanka afka ah ku qaaday dalka Sacuudi Carabiya, kaasi oo la xiriiro ololaha uu horkacayo Sacuudiga ee ka dhanka ah xutiyiinta Yemen.

Qudbad uu u jeediyay ciidanka dalkaasi oo si toos ah looga sii daayay telefishinka Qaranka ayaa madaxweyne Ruuxaani waxa uu ku eedeeyay Sacuudiga in uu gobolka ka abuurayo naceyb, waxa uuna sheegay in Sucuudiga uu heli doono jawaabta arrimahaasi ha dhawaato ama ha dheeraato.

“Go’aanka Midawga Yurub Wuxuu Noola Muuqdaa Mid Duulaan Ku Ah Dhaqankayga Iyo Diintayda, EU-duna Kaligood Xuquuqda Ma Yaqaanaan” Xildhibaan Indho-indho

Xildhibaan Cabdiqaadir Maxamed Xasan(Indho-indho), oo ah Gudoomiyaha guddida Xuquuqal Iisaanka iyo arrimaha bulshada golaha guurtida Somaliland, ayaa Midawga Yurub ugu baaqay inay aqbalaan qaddiyadda Ictiraaf raadinta Somaliland.
Xildhibaanka oo ku hadlayay Afka guddida iyo kan Golaha oo dalka u qaabilsan Arrimaha diinta, dhaqanka iyo amaanka ayaa sheegay inay taageersan yihiin fulinta Qisaasta oo dhiiri galinaysa amaanka, sidoo kalena ah Amarka Alle iyo shuruucda Somaliland oo la fuliyay.
Xildhibaanku waxa uu sheegay in fawdada oo Somaliland ku badataa aanay kaligeed saamaynayn balse ay Geeska ku baahayso “Wuxuu go’aanka Midawga Yurub noola muuqdaa mid duulaan ku ah oo ka hor imanaya dhaqankayaga iyo Diintayada. Waxaanu leenahay EU-du kaligood ma yaqaanan Xuquuqda Aadamaha. Xuquuqal Iisaanka Midawga Yurub sheegayaa anigu ma garanay mid uu yahay laakiin, waa go’aan lagu soo weerarayo dawladda Diinteeda iyo dhaqankeeda ilaashanaysa,” ayuu yidhi Xildhibaan Indho-indho.
Xildhibaanku waxa uu intaasi raaciyay “Waxaan leeyahay Midawga Yurub haddii uu xuquuqal Iisaan garanayo dadka Somaliland ee Laasqoray ilaa Lowyacaddo iskaga yimid, ee Xuquuqdoodii aadamaha la soo noqday ee dawladda Samaystay, ee Nabad galyo ku ilaashanaya, wixii Beesha caalamka ay ugu baahnaayeen oo ah Citiraaf ay Midawga Yurub ka hagranayaan, hadday Somaliland waxtarayaan Citiraafka ay Shuruudihiisii Buuxisay, xuquuqal Iisaanka way ku jirtaaye waa inay taas ka hadlaan.”
Xildhibaanku waxa uu sheegay in Maxaabiista Dil sugeyaasha ah lacag lagu siiyo Jeelka “Qofkii qofka dilay ayay Midawga Yurub iyo UNDP jeelka lacag ku siiyaan oo Magaalada Hargeysa la iskugu faano intaan ku dilo ayaa Midawga Yurub iyo UNDP Jeelka igu biilin doonaan baanu maanta Maraynaa.”
Hadalka Xildhibaanka ayaa ka dambeeyay Go’aan ka dhan ah 6-dii Qof ee Somaliland qisaasta ku fulisay 13-kii bishan oo Midawga Yurub soo saaray kuna sheegay arrin aan la aqbali Karin,kana dhan ah xuquuqda Aadamaha. Waxay ku baaqeen in la joojiyo dilista dadka wax dilay.

Xukuumadda Somaliland Oo Xabsiga Dhigtay Guddoomiyihi Xarunta Xuquuqul Iinsaanka Ee Hargeysa.

Xukumadda Somaliland ayaa xabsiga dhigtay Guuleed Axmed Jaamac, oo ah Gudoomiyaha Xarunta Xuquuqal Iisaanka Somaliland oo fadhigeedu yahay Hargeysa. Ma jiro war rasmi ah oo ka soo baxay xadhiga Masuulkan, hase ahaatee wararku waxay sheegayaan in loo haysto Arrinta Qisaasta ee Xukumaddu fulisay oo uu saxaafadda kala hadlay. Xuruntan Xuquuqal Iisaanka oo ah mid Madax banaan ayaa u hawl gasha sidii Heerka Xuquuqda Aadamaha kor loogu qaadi lahaa.

Xarunta Xuquuqal Iiisaanka Somaliland(Somaliland(Somaliland Human Right Center), ayaa arrintan qoraal ka soo saartay waxaanu u dhignaa sidan:-
Waxaa maanta (18.04.2015) abaaro 09:00 subaxnimo lagu xidhay maxkamada gobolka Hargeisa Guleid Ahmed Jama oo ah Gudoomiyiha Xarunta Xuquuqal Insaanka isagoo hawl maalmeedkiisa shaqo ee caadiga ahaa ku guda jira. Waxaa amarka qabashada bixiyay Gudoomiyaha Maxkamada Gobolka Hargeisa. Amarkaas qabashadu muu ahayn mid sababaynsan. Waxaa la qabtay iyadoo aan waaran qabasho oo maxkamadi soo saartay aanu jirin.
Gudoomiyaha Maxkamada Gobolku waxa uu si cad ugu xad gudbay qodobka 25aad ee Dastuurka Jamhuuriyada Somaliland kaas oo dhigaya inaan qofna la xidhi karin iyadoo aan loo hayn Waaran Qabasho oo Sababaysan.
Xarunta xuquuqal Insaanku waxay si adag u cambaaraynaysaa xadhigaa sharci darada ah ee lagula kacay Gudoomiyaha Xarunta. Waxaanay ugu baaqaysaa Xaruntu Gudoomiya maxkamada Gobolka inuu si deg-deg ah xoriyadiisa ugu soo celiyo Guleid Ahmed Jama.
Ahmed Hussein Abdi
Human Rights Center
Hargeisa Somaliland
+252 2 411749

Somaliland: Fulintii Xukunnada QISAASTA Ah Oo Cagaha Dhulka U Dhigay Xaaladda Ammaan Ee Magaalooyinka Dalka & Dareenka Dadweynaha

Inta badan Magaalooyinka Somaliland, gaar ahaan Magaalo Madaxyada Gobollada dalka ayaa laga dareemayaa amaan ka xoog badan sidiii hore tan iyo markii xukuumadda Somaliland Qisaasta ku fulisay lixda Gacan ku dhiigle, kuwaasi oo bilow u ahaa tobaneeyo kale oo dil sugayaal ah.
Magaalada Hargeysa, caasimadda Somaliland oo bilihii u dambeeyay ay ku soo bateen dilalka dadka rayidka ahi isku geystaan isla-markaana ciidamada ammaanku dhibaato ku qabeen soo qabashada dadka kiisaska dilka ah geysta ayaa wixii ka dambeeyay Qisaasta lixda qof waxa meesha ka baxay kiisaskaasi iyo cabsidii dadku ka qabeen inay socdaan xilliyada dambe ee habeenkii.
Hargeysa oo xilliyada dambe ay adkayd in qof aan hubeysnayn uu si kalsooni leh u dhex lugeeyo, isagoo cabsi ka qaba inuu naftiisa ku waayo Moobeyl ama lacag uu jeebka ku sito, ayaa toddobaadkii hore laga soo bilaabo ammaankeedu ammaankeedu dib ugu soo laabtey.
“bilihii u dambeeyay waxaanu habeenkii la kulmi jirnay dhallinyaro budhadh iyo tooriya sita, laakiin intii dilka lagu fuliyey Maxaabiistii hore dilalka u geystay, ma aragno dhallinyaro ama cid kale oo dadka dhibaateynaysa” sidaa waxa Wargeyska Somalilandtoday u sheegay mid ka mid ah ciidamada ammaanka ee habeenkii heeganka kaga jira waddooyinka Caasimadda Hargeysa, waxaanu intaasi ku daray in Qisaasta la fuliyey ciidan ahaan ay culayskii ka haystay sugidda nabadgalyada ka yareysay.
Dadweynaha ku dhaqan Magaalada Hargeysa ayaa soo dhaweeyay fulinta Qisaasta dadka dilka u xidhnaa, waxayna sheegeen in arrintan ay muhiim u tahay nabadgalyada “Qisaastu innaga ayay muhiim inoo tahay, waayo ILAAHAY baa banneeyay in la qisaaso naftii disha naf kale..” sidaa waxa yidhi, Cabdiraxmaan Axmed oo la hadlay Somalilandtoday.
Faarax oo ka mid ah dadweynaha ku dhaqan Magaalada Berbera ayaa isaguna sheegay “Dilalkii joogtada ahaa ka dhacayey dalka iyo ciidamadu dhexdoodu waxay muujinayeen in dabac ku yimid ammaankeena, laakiin dilka lagu fuliyey dadkii hore dilalka u geystay waxay ka hor-tageysaa nabadgalyo darada” ayuu yidhi, isagoo xukuumadda ku amaanay go’aanka ay ku qaadatay fulinta qisaasta.
Sidoo kale, Magaalada Burco oo ka mid ah Magaalooyinka Somaliland ee dilalka ugu badan ka dhici jireen isla-markaana dadku aadka uga adeegsadaan tooreyda, ayaa hadda dadku aad uga taxadaraan falalka keenaya amaan daro iyo dilalka, ka dib markii la Qisaasay gacan ku dhiigle si wada jir ah Magaaladaasi ugu dilay Laba Marxuum oo kala ahaa Gabadh iyo nin.
Wariyaha Somalilandtoday ee gobolka Togdheer ayaa soo sheegaya in Qisaastii gacan ku dhiiglayaasha ka dib ay meesha ka baxday kalmad ay dadku iskugu hanjabi jireen oo ahayd “Intaan ku dilo ayaan Albeerkada tagi), taasi oo looga jeedo in qofka dil geysta ay hay’adaha reer galbeedku lacag siiyaan inta uu jeelka ku xidhan yahay.
Wariyaha ayaa sheegay in wixii ka dambeeyay Qisaasta lixdii gacan ku dhiigle ay dadweynaha reer Burco aanay ku kaftamin dil iyo wax la mid ah, taasi oo caadi ka ahayd sanadihii u dambeeyay.
Sidaasi si la mid ah ayaa Magaalooyinka kale ee Somaliland looga soo dhaweeyay fulinta Qisaasta oo dawladda iyo dadkuba fahmeen in amaankoodu ku xidhan yahay, ka dib markii ay si is daba joog ah u dhaceen dilal fool xun oo qaarkood sida loo geystay ay ku cusbayd Somaliland, dadkuna ay ka argagaxeen.
Dawladaha Midowga Yurub oo dhanka dhaqaalaha ka taageera Somaliland ayaa dhibsaday fulinta Qisaasta, waxayna sheegeen inay sharaf dhac ku tahay Milgaha bani-aadamka, sidaasi daraadeedna la joojiyo, laakiin xukuumadda Somaliland ayaa sheegtay in aanay jirin cid joojinta dilalka lagu fulinayo dadka gacan ku dhiiglayaasha ah ee hore dilalka u geystay “Dalkani Qawaaniin iyo shuruuc uu dhigtay ayuu leeyahay, kuwaasaana lagu dhaqmayaa, cid iska hortaagi kartaa Somaliland inay qawaaniinteeda ku dhaqantaanna ma jirto” sidaa waxa warbaahinta u sheegay Wasiirka wasaaradda Caddaalada Somaliland, Xuseen Axmed Caydiid

ROMA: 400 Soomaali Tahriibayaal Ah Oo La Badbaadiyey Iyo Magaca Wiil Dhallinyaro Ah Oo Ka Waramay Dhibaatadii Ay Mareen

Ciidammada ilaalada xeebaha ee dalka Taliyaaniga ayaa sheegay in ku dhawaad 10 kun oo qof oo tahriibayaal ah la badbaadiyay todobaadkan oo keli ah. Doraad oo Khamiis aheyd oo keliya waxaa la badbaadiyay 900 oo qof.
Horraantii todobaadkii dhamaatay ayaa waxaa dhimatay 400 oo qof oo doontii ay saarnaayeen ku qariqantay badda Mediterranean-ka, laakiin waxa ka dambeysay 40 qof oo iyaguna dhintay markii doontii ay saarnayeen baddu liqdey.
Cabdiraxman Maxamud Xasan, waxa uu ka mid yahay boqollaal Soomaali ah oo laga badbaadiyey badda isla-markaana u gudbay dalka Talyaaniga.
Cabdiraxmaan oo isaga iyo boqollaal kale lagu hayo xero ku taalla Magaalada Roma ee Caasimadda Talyaaniga ayaa laanta afka Soomaaliga ee idaacadda BBC-da uga waramay sida uga badbaadeen Badda iyo xilliga uu ka tahriibay Liibiya “Waxaanu badda soo galney lixdii subaxnimo ee Jimcihii hore, baddu dhibaato baddan ayay leedahay. Laakiin waxaanu raacnay Doon iska fiicanayd, waxaanuna doonta ku saarnayd 690 qof” ayuu yidhi, Cabdiraxmaan oo intaasi ku daray “Doonta inkasta oo ciladi gashay haddana cidna nagagama dhimanin, laakiin Doonta oo laba dabaq ahayd qaybta hoose ayay biyo soo galeen, laakiin cidna nagama dhiman, waayo waxaanu ka dhurnay biyihii, laakiin mar kale ayuu Mishiinku naga fadhiistay, halkii uu nagaga xumaaday ayaanu iska joognay, dabadeedna halkii buu Markab noogu yimid oo uu nagu badbaadiyey”
Cabdiraxmaan waxa kale oo uu sheegay “Soomaalida aanu doonta ku saarnayn waxaanu ahayn 400 iyo dheeraad” ayuu yidhi, waxaanu intaasi ku daray “Talyaaniga ayaa na soo dhaweeyay, markii horena hay’adda Save The Children ayaa baadhitaan caafimaad nagu samaysay, intii xanuunnada laga helayna waa la reebay, si loo daweeyo, intayadii kalena xero ayaa la na geeyay”
Cabdiraxmaan waxa uu dhallinyarada Soomaaliyeed uga digay inay naftooda halis ku galiyaan Tahriib, isagoo ka sheekeeyay dhibaato xanuun badan oo uu ku mutay tahriibka.

Hordhac: Barcelona v Valencia – Blaugrana Oo Wajaheysa Mid Ka Mid Ah Kulamadii Ugu Adkaa Ee U Haray Xilli Ciyaareedka La Liga.

l
Kulanka: Barcelona v Valencia
Garoonka: Camp Nou
Waqtiga: 5pm Saacada Geeska Afrika
Mid ka mid ah kulamada ugu adage e u haray horyaalka La Liga ayay maanta Barcelona wajaheysaa iyagoo garoonka Camp Nou ku soo dhaweynaya kooxda Valencia. Barca ayaa ka soo gudubtay imtixaankii Paris Saint-Germain ee bartamihii isbuuca iyagoo guul weyn ka soo gaaray, waxaana ay haatan rajeynayaan inay hogaanka horyaalka ka sii xajistaan kooxda Real Madrid.
Kooxda reer Catalan ayaa sameysay taariikh 2009kii markii ay noqdeen kooxdii ugu horeysay ee Isbaanish ah ee ku guuleysata La Liga, Copa del Rey iyo Champions. Taariikhda ayaana laga yaabaa inay isku soo celiyo iyada lafteed xilli ciyaareedkan.
Barca waxa ay durbaba joogaan finalka Copa del Rey oo ay bisha May la ciyaarayaan Athletic Bilbao, waxa ay labo dhibcood oo horyaalka ah ka sareeyaan kooxda Real Madrid, waxaana ay hal lug la sii galeen semi-finalka Champions League.
Barca ayaase u baahan maanta inay ka soo kabsato barbarihii 2-2 ee isbuucii hore ka soo gaartay kooxda Sevilla, taasoo markaas u sahashay kooxda Real Madrid inay farqigii 4ta dhibcood ka soo dhigto labo dhibcood.
Iska ilow todoba kulan ee aan laga badiin Barcelona horyaalka La Liga, ama sideeda kulan ee aan laga badinin Atletico Madrid. Valencia ayaa ah kooxda qaab ciyaareedka ugu fiican ku jirta iyagoo aan laga badinin 10kii kulan ee ugu danbeysay iyagoo badiyay 7 ka mid ah islamarkaana barbaro galay seddexda kulan kale, taasoo ka dhigeysa in Barcelona uu war heysto maanta.
MAXAA KA CUSUB?
Waxa ay u badan tahay in Andres Iniesta uu seegayo kulanka maanta ay Barcelona soo dhaweyneyso kooxda Valencia ka dib markii bareelo looga saaray garoonka kulankii ay bartamaha isbuuca ka badiyeen PSG. Xavi ayaa buuxin doona booskiisa kaasoo laga yaabo inuu markii ugu danbeysay ka horyimaado Valencia madaama la saadaalinayo inuu baxayo xagaaga.
Dani Alves ayaa ka soo laabtay ganaax uu kaga maqnaa kulankii Champions League waxaana uu daafac midig ka bedeli doonaa Martin Montoya inkastoo hubanti la’aan weyni ay ku jirto mustaqbalkiisa.
Soo laabashada Nicholas Otomendi ee ganaaxii uu ku maqnaa ayaa war wanaagsan u ah Valencia ka hor kulanka Barcelona ee maanta. Kooxda martida ah waxaa ka maqnaan doona labo ciyaaryahan oo muhim ah weeraryahanka Pablo Piatti iyo daafaca bidix ee aadka loo qiimeeyo Jose Luis Gaya.
SHAXDA MACQUULKA AH:
Barcelona: Bravo; Alves, Pique, Mascherano, Alba; Busquets, Xavi, Rakitic; Neymar, Suarez, Messi
Valencia: Diego Alves; Cancelo, Mustafi, Otamendi, Vezo; Feghouli, Parejo, Fuego, Andre Gomes; Alcacer, Rodrigo

Kulamada Xiisaha Leh Ee Caawa Laga Ciyaari Doono Horyaalka Spain, Real Iyo Barca Oo Isku Dhegan

Kulanka: Real Madrid v Malaga
Garoonka: Santiago Bernabeu
Waqtiga: 9pm Saacada Geeska Afrika
Real Madrid ayaa martigelineysa Malaga caawa iyagoo raadinaya guul ay cadaadis ku saaraan Barcelona tartanka horyaalka La Liga. Iyadoo labo dhibcood ay kala saarto labada kooxood, kooxda Carlo Ancelotti ayaa fursad u heysta inay hogaanka la wareegaan haddii kooxda Catalans ay ku hor sibxato kooxda rajada ka leh Champions League xilli ciyaareedka danbe ee Valencia.
Real Madrid waxaa xusuusin fiican u noqotay guuldaradii El Clasico ee bishii hore, iyagoo guuldaradaas ka dib boorka iska jafay islamarkaana badiyay seddexdii kulan ee horyaalka ee ku xigtay taasoo keentay inay farqiga hogaanka horyaalka soo yareeyaan oo ka dhigaan labo dhibcood.
Kulankii ku xigay El Clasico waxa uu ahaa kulankii Granada ee ay 9-1 ku xasuuqeen iyadoo Cristiano Ronaldo uusan dhalinin wax ka yar shan gool. Waxa ay aheyd fariin si cad looga helay meel 400 miles u jirta oo ah Catalunya, waxaana macquulgal ah in Real ay hogaanka qabato iyadoo Barcelona ay martigelineyso xilli ka horeysa ciyaartooda kooxda qaab ciyaareedka ugu fiican ku jirta La Liga ee Valencia.
Los Blancos waa u muhim inay guul ka gaaraan kooxda kaalinta 7aad ee horyaalka iyagoo raadinaya horyaalkoodii ugu horeysay tan iyo 2012kii, sidaasi darteed wax qalad ah ma sameyn karaan marka ay caawa wajahayaan kooxda Javi Garcia.
MAXAA KA CUSUB?
Real Madrid ayaa waxaa ka maqan kulanka caawa weeraryahankooda Karim Benzema kaasoo jug ka soo gaartay kulankii Atletico Madrid aan weli ka soo kabsanin laakiin waxaa laga yaabaa inuu soo laabto kulanka lugta labaad ee Atletico Madrid ee Bernabeu.
Dhanka kale Gareth Bale ayaa isna soo laabanaya ka dib markii uu seegay kulankii Eibar. Dhanka kale daafaca Malaga Weligton Oliveira ayaa ka fariisan doona kulanka ay u safrayaan caasimada ka dib markii uu qaatay hurdigiisii 10aad ee xilli ciyaareedka.
SHAXDA MACQUULKA AH:
Real Madrid: Casillas; Carvajal, Ramos, Pepe, Marcelo; Modric, Kroos, Isco; James, Ronaldo, Bale
Malaga: Kameni; Rosales, Sanchez, Miguel Torres, Boka; Darder, Recio; Samuel, Amrabat, Castillejo; Juanmi

SPORTS: Falaqayn Xiiso Leh Oo Ku Saabsan Kulanka Xamaasadda Leh Ee Caawa Dhexmari Doona Kooxaha Man.united Iyo Chelsea.

Kulanka: Chelsea v Man United
Garoonka: Stamford Bridge
Waqtiga: 7:30pm Saacada Geeska Afrika
Xitaa ka hor inta aan kubada la darbeynin, waxa ay u muuqataa in horyaalka uu ku soo dhawaanayo kooxda Chelsea. Guushii ay kooxda Man United ka gaartay kulankii Manchester Derby waxa ay kala soo kulmeen dhaawacyo iyadoo Phil Jones, Daley Blind, Marcos Rojo iyo Michael Carrick ay dhamaantood seegayaan kulanka Stamford Bridge.
Afartaas maqan, maqnaanshiyaha Carrick ayaa si weyn loo dareemi doonaa, iyadoo United ay badisay 12 jeer islamarkaana laga badiyay kaliya hal jeer 16kii kulan ee Premier League ee uu Carrick ku soo bilowday xilli ciyaareedkan. Waxaa sidoo kale macquul ah inay saameyn ku yeelato arintaan Wayne Rooney oo loo soo daabulo dhanka khadka dhexe si uu u buuxiyo booskaas.
Intaas oo dhan ma ahan in la leeyahay kooxda qaab ciyaareedka fiican ku jira ee Man United ma badin karto laakiin waxa ay u muuqataa mid fursad yar u heysata inay ku badiso Stamford Bridge madaama aan Chelsea gurigeeda kulan horyaal ah looga badinin muddo hal sanno ah.
MAXAA KA CUSUB?
Chelsea ayaa rajo ka qabta in weeraryahan Loic Remy uu taan u noqdo kulanka caawa ka dib markii uu dhaawac kubka ah ku seegay kulankii QPR ee isbuucii hore. Diego Costa ayaa weli maqan laakiin waxa uu soo laaban karaa kulanka isbuuca soo socda ay la ciyaarayaan Arsenal.
Tababaraha Manchester United Louis van Gaal ayaa waxaa dhaawac kaga maqnaanaya afar ciyaaryahan oo kala ah Michael Carrick, Daley Bling, Phil Jones iyo Marcos Rojo. Jonny Evans ganaax ayuu ku maqan yahay, sidaadi darteed Chris Smalling, Paddy McNair iyo Tyler Blackett ayaa ah xiddigaha kale ee daafac dhexe ee uu soo xulan karo.
SHAXDA MACQUULKA AH:
Chelsea (4-2-3-1): Courtois; Ivanovic, Cahill, Terry, Azpilicueta; Ramires, Matic; Willian, Fabregas, Hazard; Dorgba.
Man United (4-1-4-1): De Gea; Shaw, McNair, Smalling, Valencia; Herrera; Young, Di Maria, Felliani, Mata; Rooney.
j
MA OGTAHAY?

Chelsea ayaan laga badinin afartii kulan ee ugu danbeysay ee horyaalka ee ay wajaheen Manchester United, waxaana laga dhaliyay kaliya labo gool.

Kooxda Blues ayaa ah kooxda kaliya ee horyaalka Premier League ee ka guulal badan kooxda Man United intii horyaalka Ingariiska loo bixiyay Premier League, iyagoo ka badiyay 15 jeer, halka ay United badisay 13 jeer. 17 kulana waxa ay galeen barbaro.

Manchester United ayaa badisay kaliya lix ka mid ah 23kii kulan ee ugu danbeysay ee horyaalka ee ay wajaheen Chelsea.

Shan ciyaaryahan ayaa casaan la siiyay shanti kulan ee ugu danbeysay horyaalka: Seddex laga siiyay Cheslea (Labo Branislav Ivanovic iyo Fernando Torres) iyo labo casaan oo la siiyay United (Nemanja Vidic iyo Rafael)
Garabka Bidix Ee Kooxda United
Daley Blind, Marouane Fellaini iyo Ashley Young ayaa ajh halis joogta ah Garry Neville ayaa ku tilmaamay ” Waa ay caqli badan yihiin Blind iyo Young ku darsoo Fellaini ayeey caawinaad ka helayaan waa dhibaato socota waad aragteen waxa ay burburiyeen Tottenham, Liverpool kadibna Man City ila ma aha in la jooji karo “
Mourinho ayaana laga yaabaa inuu garabka midig ee khadka dhexe uu ku soo bilaabo Remires si uu uga caawiyo Ivanovic halista garabkan ka imaan karto
Weerarka Chelsea
Ciyaartu ma noqon doonto kaliya in kooxda Chelsea ay ilaaliso United laakin sidoo kale waxa wataan weerar halis ah khabiirada sky sport ayaan aaminsan in Chelsea ay ciyaareyso kubado dhaadheer maadama ay heystaan ciyaartooy dhaadheer sida Cahil, Terry, Zouma, Drogba, iyo Matic iyo sidoo kale mucjisada kubad dhisida badan ee Eden Hazard
Dhibaatada Fellaini
Fellaini ayeey u sare kaceen mowjado taageerayaal ah kulanki ay kooxdisa kala dhantaashay kooxda ay dariska yihiin ee City waxaana hubaal ah in Jose Mourinho uu ka taxadari doono dhibta ninka dheer ee reer Belgium
Waxaa la filayaa inuu Kourt Zouma ku soo bilowda khadka dhexe ee Chelsea sido kale uu ka codasdo Remires inuu badiyo shaqada daafacashada, shaki kuma jiro in Jose uu yahay nin qorshe badan sidaas darteedna uu qorshe u keeni doono sidii loo joojin Fellaini
Kuleylka Hazard
Hadal kama taagna in maanta ay howl adag u taalo Antonio Valencia kaasoo haatan ah daafaca midig ee Man utd maadaama laga rabo inuu la macaamilo mucjisada reer Belgium ee Eden Hazard
Hazard ayaa sida dabeyshi ku soo gala diilnta kooxda ka soo horjeeda waa ayna adag taha runtii in la joojiyo sidoo kale Valencia ma aha daafac dhab ah ee waa garab midig oo khad dhexe ah inkastoo ay daafacashadiisu xumeyn hadana howl ayaa sugeysa
Hazard ayaa ah ciyaariyahanka ugu ganbiska fiican premier league wuxuuna ku guuleystay 148 jeer oo u ganbiyay daafac ka soo horjeeda waan in ka badan 46 ciyaariyahn waliba oo kale sidoo kale wuxuu leeyahay kubad abuuris fiican wuxuuna abuuray xili ciyaareedkan 88 fursadood waan ciyaariyahnka ugu kubad abuurista badan horiyaalka England
Maxay tahay iney Chelsea sameyso
Shaxda haatan ee Chelsea uma muuqato mid lagu celin karo Fellaini maadaama Nemanje Matic uu bidix yahay Febregas na uu yahay kubad abuure heer caalami ah taas macnaheeda ayaana ah in Zouma uu Ciyaaro daafacyada hortooda
Garry Neville iyo Jamie Carragar oo ah laba khabiir oo ka tirsan kanalka sky sport ayaa isku raacay in Mourinho uu sidoo kale ku fakari karo muhiimada uu khad dhexe oo adag u leeyahay kooxdiisa sidaas darteedna ay rajeynayaan in Zouma uu ku soo bliwdo booska nambar 6
Gunaanad
Waxaan markale daawaneynaa kulan adag o muhiim u ah hanashada horiyaalka hadii ay guuleysato kooxda martida ah ee United waxaa dib u furmaya tartanka horiyaalka sidoo kale hadii ay chelse guuleysatana waxa u sii fududaanaya dariiqoodi ay koobka ku hanan lahaayeen

Hooyo Ka Cadheysan Gacan Loo Qaaday Ilmo Ay Dhashay Oo Weerar Ku Qaaday Iskuul Ku Yaalla New York

Macalimad dhigta dugsi dhexe ayaa la sheegay in xaaladeeda caafimaad ay ka soo reyneyso iyada oo ku jirta cisbitaal ku yaalla magaalada New Yorkj ka dib markii six un ay u weerareen hooyo waalid ah iyo ilmo 14 jir ah oo ay habaryar u ahayd.
Dhacdadan ayaa dhacday dugsiga Alverta B. Gray Schultz oo ku yaalla deegaanka Hempstead ka dib markii sida boolisku sheegayaan markii gabadhan waalidka ah oo da’deedu tahay 34 jir ay iyada oo aan la baadhin soo gashay meel dadka lagu sugo oo ku taala gudaha iskuulka, halkaas oo ay ku sugeysay macalimad wax u dhigta inanteeda oo la yidhaahdo Catherine Engelhardt.
Hooyadan Mckenzie ayaa la hadashay macalimada oo hore la sheegay in ay u gacan qaaday inanteeda , lkn macalimada ayaa u sheegtay in marka hore ay soo marto ilaalada iskuulka taasi oo uu ka danbeeyey gacan qaad ay sameysay hooyada dhashay inanta markii hore loo gacan qaaday.
Hooyadan ayaa bilowday in macalimada ay gidaarka madaxa ula dhacdo oo ay dhulka ku jiiddo iyada oo ay caawinayeen qaar ka mid ah ardeyda oo ay ku jirto inan yar oo ay habaryar u tahay taasi oo keentay in macalimadni ay gasho koomo.
Weli maamulka iskuulku kama hadlin dhacdada, lkn iyada oo macalimadani taallo cisbitaal ku yaalla New York ayaa boolisku waxa uu baadhitaan ku wadaa sida ay wax u dheceen iyo waxyaaba sababay weerarka caynkan ah.